सुनसरी । सुनसरीको देवानगञ्ज गाउँपालिकामा शिक्षा क्षेत्रमा लामो समय योगदान पुर्याएका २८ जना सेवा निवृत्त तथा अवकाश भएका शिक्षक र कर्मचारीलाई सम्मान गरिएको छ।
देवानगञ्ज गाउँपालिकाको शिक्षा, युवा तथा खेलकुद शाखाको आयोजनामा बुधबार गाउँपालिकाको सभाहलमा आयोजित सम्मान तथा शुभकामना कार्यक्रममा गाउँपालिका अध्यक्ष वेचनप्रसाद मेहता र उपाध्यक्ष कुमारी विभा देवीले २८ जना सेवा निवृत्त तथा अवकाश भएका शिक्षक तथा कर्मचारीलाई सम्मान गर्नुभयो।
कार्यक्रमका प्रमुख अतिथि गाउँपालिका अध्यक्ष वेचनप्रसाद मेहता र विशिष्ट अतिथि उपाध्यक्ष कुमारी विभा देवी रहेका थिए। कार्यक्रममा प्रमुख प्रशासकीय अधिकृत बाबुराम घिमिरे, वडा नं. ७ का वडाध्यक्ष सूर्यनारायण यादव, प्रशासन प्रमुख डिल्लीप्रसाद पोखरेल, शिक्षा शाखा प्रमुख खनाल तथा लेखा अधिकृत बिन्देश्वर यादवको उपस्थिति रहेको थियो।
शिक्षा क्षेत्रमा वर्षौँसम्म सेवा पुर्याएका शिक्षक तथा कर्मचारीहरूको योगदानको कदर गर्दै आयोजित कार्यक्रमले उनीहरूको समर्पण र सेवाभावको सम्मान गरेको छ। उनीहरूको योगदानलाई स्मरण गर्दै आगामी पुस्तालाई गुणस्तरीय, प्रविधिमैत्री, सीपमूलक तथा जीवनोपयोगी शिक्षा प्रदान गर्नुपर्ने आवश्यकतामा समेत जोड दिइएको छ।
